換台灣駕照
我無電單車牌,只分享換台灣駕駛執照("駕照"),首先你必須要喺香港為你香港駕照做驗證,我記得駕照驗證係3個月有效的,然後喺台灣你要去監理所,即係好似香港嘅運輸署咁,果度會話你知要點做,包括做身體檢查嘅地方,通常梗有1,2間喺監理所附近。
當然你亦可以先做埋身體檢查先再去監理所然後直接申請就得。
重點黎啦,除左體檢之外,你仲要提供你最後一次入境日期嘅證明俾監理所。你一定有居留證啦,咁即係你已俾移民署收左入台證,又即係無左你最後一次入台嘅證明。你可能會話,阿哥,海關實有資料喎,你諗得無錯,但監理所都岩喎,因監理所還監理所,佢唔會搵海關攞資料囉。所以,你要先去移民署,俾好似TWD100蚊叫佢地出返張入出境證明俾你,你填要求一年內啦,唔會收多你錢嘅。
有呢張有顯示最後入境日期嘅證明,加上你passport, 香港駕駛執照, 居留證, 體檢, 就可以申請架啦,我就15分鐘換到啦~
又題外話,台灣人話好近嘅意思未必真係好近,話好遠又未必係好遠,點解呢? 因為佢地每人一架電單車(摩托),佢地去菜市場都要揸架摩托去,我就成日俾人問,呀你行過黎要幾耐呀? 我話10分鐘多D啦,佢地就會問你揸摩托定開車呀? 我話行路呀,佢地就會話哇你好健康呀咁。
台灣人真係去個7-11都要揸摩托架,所以佢地話遠,其實只係行15分鐘內嘅事。但有時佢地話好近,卻係用揸車嘅角度去講,半個鐘就到,實際上係要行個幾鐘的,所以,問google啦,其實台灣人都唔係好熟非當區嘅路架咋。
當你岩岩到台灣嘅時候,未買車,咁可以點解決出門需要? 裝 55688 啦,係台大車隊apps,仲有得俾你揀咩車種tim,只要唔係太偏遠,我都未試過無車,超好用架。
要去遠嘅地方,就撘火車啦,好平,不過記得要去柜枱買飛,否則你如果只係用優悠卡直入呢,就係企位。柜枱買飛價錢一樣,但有劃位架~